Бидний хойч ирээдүй болсон хүүхдийн боловсрол хүмүүжил нь эрдэм мэдлэг, бие бялдарын хүмүүжил төдийгүй тэдний сэтгэл зүй, дотоод ертөнцийг ч гэсэн хамарсан байх ёстой. Харамсалтай нь орчин үеийн боловсролын систем нь зөвхөн эрдэм мэдлэг, бие бялдарын хүмүүжил боловсролыг голлон анхаарч, сэтгэл зүй, дотоод ертөнцийг ерөнхийд нь мартаж орхисон байна.
Хүүхдийн боловсрол нь гадаад материаллаг ертөнцийг таньж мэдэх хийгээд өөрсдийн дотоод ертөнцийг таньж мэдэх гэсэн 2 ангилалтай байдгийг орчин үеийн боловсролын систем дутуу харсан бололтой.
Хүүхдийн гадаад ертөнцийн талаар олж мэдсэн эрдэм мэдлэг, авъяас чадвар нь тухайн хүүхдэд ирээдүйд амьжиргаагаа олоход нь туслах бөгөөд хүүхдийн дотоод ертөнцөө таньж мэдсэн боловсрол нь өөрийгөө хийгээд бусдыг амгалан амьдруулах арга ухаанд сургадаг байна.
Энэ арга бол ямар ч шашны урсгалаас ангид, шинжлэх ухааны үндэслэлтэй, ач тус нь шууд илтэд мэдрэгдэх хүүхдийн бясалгал “Анапана” юм.
“Анапана” гэдэг нь өөрсдийн орж гарч буй бодит амьсгалыг өөрөө ажиглан мэдэх гэсэн утгатай үг. Энэхүү бясалгал нь хүүхдийг одоо цагт амьдарч сургадаг бөгөөд хүүхдийн сэтгэл оюунд үүсэгч ил далд хир буртаг, буруу зуршлыг арилгахад тусалдаг байна.
Хүүхдийн “Анапана” бясалгалыг ерөнхий боловсролын сургуулиуд хийгээд бясалгалын төвүүдэд зохион байгуулдаг.
6-18 насны хүүхдүүд хэд хэдээрээ тусгай хэсэг болон хуваарилагдаж, зөвлөх багш нараас заавар зөвлөмжийг авч, бясалгалын аргыг сайн сурч, түүнийгээ хүүхэд насныхаа амьдралын салшгүй хэсэг болгоход суралцана.
“Анапана” бясалгал хийснээр хүүхдийн сэтгэл орж гарч буй амьсгал дээр төвлөрч, сэтгэлийн амгалан тайвныг мэдэрч эхэлдэг.
Бидний сэтгэлд үүсэх уур хилэн, айдас хүйдэс гэх мэтийн хир буртаг нь бидний сэтгэлийг тайван бус байдалд оруулдаг учраас сэтгэлээ юуны өмнө тодорхой хэмжээнд тайвшруулахын тулд уг “Ананапана” бясалгал нь ёс суртахууны 5 зарчим дагаснаар эхэлдэг.
- Амьтны амь хөнөөхгүй байх
- Хулгай хийхгүй байх
- Худал хэлэхгүй байх
- Архи тамхи хэрэглэхгүй байх
- Бусдыг хорлохгүй байх
Хүүхдүүд бясалгал хийж байгаа болохоор эдгээр сургаал зөвлөмжийг сэтгэлдээ шууд тусган авах нь ажиглагдсан бөгөөд ингэснээр хүүхдүүд өөрсдийнхөө сэтгэл оюуныг ажиглахад суралцаж эхэлдэг.
